مغالطة الحجة الشخصية
شلونهم الربع ان شاء الله زينين ..اليوم مغالطتنه كارثية واني واحد من الناس واكع بيه هواي وما اخفيكم دا أحاول اتخلص منه شويه شويه .. 😇
مغالطة الحجة الشخصية /
معناه انو الطرف الثاني يعمد الى الطعن في شخص المتكلم بدلا من تفنيد قوله .
وكلنا نعلم ان 1+1 = 2 هي عبارة صحيحة سواء كان قائلها عدوا او صديقا
وعليه فإن الحجة لا تدحض الا بحجة .
اما مغالطتنا هذه فتعتمد على الهجوم على الطرف المتكلم بإبراز سلبية له او الطعن بشخصه او الانتقاص منه .
وبإمكاننا ان نصنفها الى نوعين هما :
الأول / #القدح_الشخصي
في هذا النوع يعمد الطرف المقابل الى الهجوم على المتكلم بإبراز سلبياته ومثالبه فيبدو من خلال التداعي السيكولوجي كأن حجته أيضا سلبية مثله !!
مثال على ذلك /
* انا لا اثق بفلسفة فرانسيس بيكون فهو رجل قد سحب منه منصب قاضي القضاة لتقاضيه الرشوة !
الثاني / #أنت_أيضا
مغالطة أنت أيضا تفعل ذلك .. وبهذا النوع يقوم الطرف المقابل بإعادة توجيه السؤال بالاستنكار الى المتحدث بقوله : انت هم هيج اتسوي موبس آني ؟!
مثال على ذلك /
* أبويه يكلي ليش متصلي..وهو لا صلاة ولا صوم بشبابه 😏
* آني جم مرة كايلك اذا الكفك تشرب جكاير أجنزك كتل ؟
- هو بس اني اشرب جكاير قابل .. مو انت بعمري هم جنت اتدخن !!
هســه نجي نسولف شلون نتعامل ويه هذني النوعين:
في الحالة الأولى تجاوب الخصم بقولك :
حبيبي ماكو أي ربط بين الفكرة وبين الشخص فعلي بن ابي طالب يكول ( خذ الحكمة ولو من افواه المجانين ) .
وأفضل تصرف بالحالة الثانية هو ان تبتسم معترفاً بذلك .. وترجع ترده لحجتك الاصلية الي بعده ما جاوب عليه أصلا .
نلتقي غدا مع مغالطة جديدة تفيدنه بحياتنه بعنوان
👇👇
(( الإحراج الزائف ))
#محمد