انتي ؟!! اي انتي !!
صباحوو الخير
متخرجة وماكو وظيفة او شغلة تلتهين بيها..
وماجاييج فارس الاحلام لسه ، منتظر حصانه الابيض يكعد من النوم..
وخابصتنه بمنشورات بيها من التعاسة لا بالحرب العالمية الاولى والثانية ، ولا بقمبلة هيروشيما على اليابان ناشرين مثلها
انتي الكاعده طول اليوم متكأبة ومتنرفزة وسادة ابواب العالم كلها بوجهج ، عساه عمره ما اجه التعيين ويعني ،
ولا اجه فارس احلامج وحصانه المبنجر وشراح يصير ؟!! توكف الدنيا علمودج
غلطانه!!
انتي اللى راح توكفين بمكانج وكلشي راح يمر كدامج
الدنيا متوكف على شيء..
غيري نظرتج للامور راح تشوفيها نعمة
اي نعم ، وقت فراغ عندج هواي
كعدت البيت متنراد
روتين ينعاد كل يوم
فرصة!!!!
حتى تبرين وتحصلين رضى امج وابوج اكثر وقت ممكن.. تخدميهم وتكونين بجانبهم 👨👩👧
تقرأين أو تدرسين او تسجلين دورات تنمية او لغات او اي شي يطور من قدراتج ومؤهلاتج اكثر 👩💻👩🏫
فرصة ترتبين بيه عباداتج 🙏 تتقربين من ربج اكثر وتعرفيه أكثر ، وتوثقين علاقتج بيه💚.
تنمين مواهبج -بعد متحدديها وتكتشفيها اول - قراءة ، كتابة ، رسم ، نحت ،اعمال تطوعيه تطريز ، طبخ ، كل شي تشوفين نفسج تكدرين عليه وتبدعين بيه 🙅♀
" قيمة كل أمرئ ما يُتقن " 😉
فرصة حتى تكونين انسانة واعية ، عندج متسع الوقت حتى تعملين على شخصيتج اكثر ، تتخلصين من سلبياتج وعاداتج اللي تشوفيها سيئة ، وتستبدليها بعادات جيدة..👏✊
فرصة حتى تبنين نفسج وتكونين گد مسؤولية بيت وزوجة صالحة👰 ومربية أجيال فاضلة..🤱
حتى تكونين انسانه جيدة و الج وزنج بنظر نفسج أولا والمجتمع ثانيا 😾
وبالتالي هذه الوقت اللي شغلتيه بما ينفع كفيل أنه يصنع الج عالمج الخاص تلجأين اله ، وتكتسبين منه اكتفاء ذاتي من السعادة والايجابية بحيث تصير ما مرتبطة بشخص -انسان - او مادة او ظرف بالعكس انتي تصيرين مصدر السعادة والايجابية للناس الحواليج 💗
أبد لا تنتظرين الحياة هيه شوكت تتفضل عليج وتدك الباب وتنطيج اللي تريديه😠 ، لا انتي اسعي وابحثي واستغلي كل الفرص.
وبالنهاية تذكري زين عزيزتي
.
"لا يهم اذا كنتِ قد انجبت اطفالا.. ام كتبتِ كتبا.. او بعتِ الفطائر في الشارع.. او وقعت عقد عمل بمليون دولار.. ما يهم هو ان تكوني سعيدة ومكتفية من الداخل😌💙
."
اليف شفق -روائية تركية -
.
أحرصي على ان تكوني سعيدة
ومكتفية من الداخل 💚
#حنا🌿